காந்தி ஜெயந்தி கவிதை

–
இராய செல்லப்பா

ஆகிடுவேன் ஓர் நாள் – அண்ணல்
காந்தியைப் போலே வாழ்வினில் நானும் (ஆகிடுவேன் .. )

உப்பும் மிளகும் அப்பிய கூந்தல்
ஒருநாள் உதிர்ந்துவிடும் -அதில்
செப்பழகுடைய கண்ணாடி வழுக்கை
சீக்கிரம் மலர்ந்துவிடும்! (ஆகிடுவேன் .. )

எத்தனை நாள் தான் முப்பது பற்கள்
என்னுடன் வாழ்ந்துவிடும்? -அட
பொக்கை வந்திடும்! பயிற்சி எடுத்தால்
புன்னகை வந்துவிடும்! (ஆகிடுவேன் .. )

தொப்பை இருக்குது கொஞ்சம்தான் அதைக்
குறைத்திட முயலுகிறேன்
நடத்தல் பயிற்சியும் பூசணிச் சாறும்
நல்லது செய்யாவோ? (ஆகிடுவேன்…)

உச்சி வளைந்த தாத்தாக் கொம்புகள்
வீட்டினில் நான்குண்டு – அதில்
ஒன்றையெடுத்து வண்ணம் பூசிடில்
உடன்வரத் தடையென்ன? (ஆகிடுவேன் .. )

காலுக்கணிவது பிளாஸ்டிக் வேண்டாம்
கட்டையில்தான் வேண்டும் -எனில்
காதியில் போனால் கால் சைஸ் பார்த்துக்
கவர்ந்திட லாகாதோ ? (ஆகிடுவேன் .. )

இடுப்பில் அணிந்திடக் கடிகாரமொன்று
இருக்குது என் வீட்டில் -அப்பா
எனக்கென விடுத்த சீதனமாகும்
என்ன குறை போங்கள்! (ஆகிடுவேன் .. )

எட்டு முழத்தை இரண்டாய்க் கிழித்தால்
நாலு முழமாச்சு! -அதைக்
கண்ணாடி பார்த்துக் கட்டி முடித்தால்
காந்தி மடிப்பாச்சு! (ஆகிடுவேன் .. )

அடடா ஒன்றே பாக்கி இருக்குது
ஆட்டுப்பால் வேண்டும்! -அட
சொன்னால் போதும் சொர்ணாக்கா விடம்
சூடாய்க் கிடைத்துவிடும்! (ஆகிடுவேன் .. )

இந்தியும் தெரியும் ஆங்கிலம் தெரியும்
எழுதவும் நான் அறிவேன் – செவி`
எங்கே கிடைத்தாலும் பயனுறும் சொற்கள்
என்னிடம் ஏராளம்! (ஆகிடுவேன் .. )

இத்தனை இருந்தும் காந்தியாய் என்னை
ஏற்றிட மாட்டீரோ! – அட
இருந்திடக் குடிசை இல்லை என்பதால்
ஏளனம் செய்வீரோ? -இல்லை

வேஷம் போடும் வித்தையில் திறமை
போதா தென்பீரோ? -இல்லை
சின்னத்திரையோ சினிமாத் தொடர்போ
இல்லை என்பீரோ? (ஆகிடுவேன் .. )

ஆகிடுவேன் ஓர் நாள் – அண்ணல்
காந்தியைப் போலே வாழ்வினில் நானும் (ஆகிடுவேன் .. )