முனைவர் சிவகாமசுந்தரி நாகமணி /அயல் நாட்டுக் காதலி

சே . இவ்வளவு மோசமானவனா என் கணவன் ?
பவித்ராவுக்குப் பற்றிக் கொண்டு வந்தது .
விஷயம் இவ்வளவுதான் . அண்மையில் பாண்டிச்சேரி செல்லும்போது , பேருந்து நிலையத்தில் ஆதரவின்றி நின்ற ஜூலியைப் பார்த்தாள் . அவள் ஒட்டுப் போட்ட உடையையும் , ஒற்றைக் கண் பார்வையையும் பார்த்து , ஏற்கெனவே இரக்க குணம் படைத்த பவித்ரா , வீட்டுக்கே அழைத்து வந்து , வீட்டில் ஒருத்தியாய் அவளையும் பார்த்துக் கொள்ள ஆரம்பித்து கிட்டத்தட்ட ஒரு மாதமாகிறது .
அவள் கணவன் ஜூலியிடம் , “ஹேட் யுவர் லஞ்ச் ? ஹாவ் யு ஸ்லெப்ட்?” என்றெல்லாம் விசாரித்து , அதிக பட்சக் கரிசனம் காட்டுவதைக் காணச் சகிக்கவில்லை . அது மட்டுமின்றி, அடிக்கடி தனியாகச் சென்று , யாரிடமோ போனில் பேசி வருவதன் காரணம் புரியவில்லை .
அன்று வீட்டில் இவள் இல்லை என்ற துணிவில் , லேண்ட் லைன் போனில் யாரிடமோ பேசிக் கொண்டிருந்தான் .
அந்தப் போனுக்கு மாடி ரூமில் , இணை இணைப்பு இருந்ததால் சத்தம் போடாமல் மாடியறைக்குச் சென்று , அவன் பேசுவதை ஒட்டுக் கேட்டவளுக்கு இன்ப அதிர்ச்சி !
“ஆமாம் அக்கா ! நம்ம அப்பாவுக்குப் பாண்டிச்சேரியில் ஒரு அயல் நாட்டு பெண் காதலி இருந்ததையும் , அந்தப் பெண்ணைச் சூழலால் பிரிந்து , தொடர்பு இல்லாமல் போய் , எங்கு அவள் இருக்கிறாள் என்றே கண்டுபிடிக்க முடியாமல் போனதையும் சொல்லி , அப்பா இறந்ததும், அம்மா அவள் போட்டோவைக் காண்பித்ததையும் இந்தப் பெண் ஜூலியைப் போலவே அவள் இருப்பதால் , இந்தப் பெண் மேல் எனக்கு இனம் புரியாத பாசம் வருவதால் , ஒரு வேளை இவள் நமக்குச் சகோதரியாக இருப்பாளோ என்ற சந்தேகத்தில் அப்பாவின் பழைய நண்பர்களிடமும் பவித்ராவுக்குத் தெரியாமல் விசாரித்ததையும் , பவித்ராவிடம் சொல்ல முடியாமல் தவிக்கிறேன் …நீ ஒரு முறை இங்கு வாயேன் . ஜூலியிடம் விசாரிக்கலாம். நான் ஜூலியிடம் பேசினால் பவித்ரா தவறாக நினைப்பாள் ,” என்றான்.

நாபா.மீரா/விழிகளில் ஒரு வானவில் – விருட்சம் நாளிதழ்