இடைக்காட்டுச் சித்தர் பாடல்/ மா கோமகன்

அறிவோடு கிளத்தல்

நல்வழியில் சென்று நம்பதவி எய்தாமல் கொல்வழியிற்

சென்று குறுகுவதேன் புல்லறிவே

விளக்கம்: சிறுமையுள்ள அறிவே!நீ நல்ல அறவழியில் சென்று புகழ் பெற்ற நல்வினைக் கணக்கை எழுதாமல் ஆருயிர்களை கொன்று மறவழியால் இகழைத் தேடுவது ஏன்?

கைவிளக்கு கொண்டு கடலில்வீழ் வார்போல்

மெய்விளக்குன் னுள்ளிருக்க வீழ்குவதேன் புல்லறிவே

விளக்கம்: சிறிய அறிவுடைய மனிதா! கையிலே விளக்கைப் பிடித்துச் சென்றும் கடலிருப்பது தெரியாமல் அதிலே விழுந்து விடுவாரைப் போல உண்மையான கடவுளொளியாம் விளக்கு உயிரிலே இருக்கும் நிலையில், அதை பயன்படுத்தாமல், தீய நெறியில் சென்று வீழ்த்தழிவது எதற்காக? ஐயோ!