குறையொன்றுமிலலை /ஆர் வத்ஸலா

பிரசவ மருத்துமனையில்
பயங்கர வலியுடன்
நள்ளிரவில்
சேர்க்கப்பட்ட அம்மாவை
பரிசோதித்த மருத்துவர்
சாந்தகுமாரி
கோபமாக
“சும்மா கத்தாதெ. எல்லாம் காலெலதான் ஆகும்”
என்று கூறிவிட்டு
அருகில் இருந்த தன் வீட்டிற்கு படுக்கப் போய்விட
சிறிது நேரத்தில்
என் தலை லேசாக தெரிய
செவலி அலற
சாந்தகுமாரி
அசாந்தமாக
எனை வெளியே கொண்டு வர
நான் வலியால் ஊளையிட்டேன்
என்று கேள்வி

அப்போதிலிருந்தே
ஊருடன்
ஒத்துப் போகத் தெரியாமல் நான் இழந்தது பல

தலைகாணி மந்திரம்
போடத் தெரியாததால்
ஒரு கவசம்

கால் பிடிக்கத் தெரியாததால்
சில பதவி உயர்வுகள்

அதிகாரம் செய்யத் தெரியாததால்
சிலரின்
மரியாதை

பெருமையடித்துக் கொள்ளத் தெரியாததால்
சிலரின் மதிப்பு

இப்படி பல

அதனால் என்ன?

என் மதிப்பை பெற்ற
சிலரின் மதிப்பு
எனது அன்பின் ஆழத்தை அறிந்த
சிலரின் அன்பு –

இது போதுமே எனக்கு
4/7/22 காலை 11 மணி