புத்தாண்டு வாழ்த்துக்கள் /
ஆர் வத்ஸலா

என் புலன உரையாடல்கள் பிதுங்கி வழிகின்றன
இன்று
புத்தாண்டு வாழ்த்துக்களால்

சேமிக்கும் அளவுக்கு
முக்கியம் எனக் கருதாத எண்களிடமிருந்து சில –
சுய அடையாளத்தை
சாமிப் படத்தில் மறைத்துக் கொண்டு

விச்வ ரூபம் எடுத்து பயமுறுத்தும்
ஜிஃப்களுடன் சில

என்னுடன் உறவு வைத்துக் கொள்வதில் ஏதோவொரு
லாபம் கிடைக்கும் எனும் எதிர்ப்பில் சில

சகிக்கிறேன் இவற்றை –

எனதன்புக்கும் மதிப்பிற்கும்
உரிய சிலரிடமிருந்து எளிமையான சொற்களுக்குள்
உண்மையான அன்பை நிரப்பி வரும்
ஒரு சில வாழ்த்துக்களுக்காக