சொல்லாமல் கொள்ளாமல் ஏறிவிட்டது விலைவாசி/சசிகலா விஸ்வநாதன்

(1)

சொல்லாமல் கொள்ளாமல் ஏறிவிட்டது விலைவாசி
சொல்லிவிட்டா எகிறும் இந்த விலைவாசி
கொள்ளி போல் உக்கிரம் காட்டும்
ஏறும் அகவிலை குறையாதா?

                 (2)

சொல்லாமல் கொள்ளாமல் ஏறிவிட்டது விலைவாசி.
சொல்லாமல் கொள்ளாமல் விடுப்பில் செல்லும்
செல்லம்மா; கொண்டவன் கண்ணில் இயலாமை!
என்றுதான் மாறுமோ இந்நிலை?

   ‌‌            (3)

சொல்லாமல் கொள்ளாமல் ஏறிவிட்டது விலைவாசி;
தங்கமும் வெள்ளியும் எட்டா இடம்!
பட்டு கூறை புடவை; எப்படி
வாங்க? இந்த நிலையில்?

              (4)

சொல்லாமல் கொள்ளாமல் ஏறிவிட்டது விலைவாசி.
சொல்லாமல் கொள்ளாமல் வந்த விருந்தினர்…
பக்கத்து வீட்டிலிருந்து ஒரு விண்ணப்பம்..
ஐயாயிரம் கிடைக்குமா; கைமாத்தாக?

              (5)

சொல்லாமல் கொள்ளாமல் ஏறிவிட்டது விலைவாசி.
ஏறட்டும்! ஏறட்டும்!ஏறினால் என்ன!
இறங்கினால் என்ன! இருப்பது போதும்
எங்களுக்கு இதுவே அதிகம்.

                (6)

சொல்லாமல் கொள்ளாமல் ஏறிவிட்டது விலைவாசி.
சொல்லாமல் கொள்ளாமல் வரன் தகைந்தாயிற்று;
தாலிக்குப் பொன்னும்,காது,மூக்கு
பொத்தவும் ஏது வழி?

            (7) 

சொல்லாமல் கொள்ளாமல் ஏறிவிட்டது விலைவாசி.
கெஞ்சிக் கேட்டும் பஞ்சப்படி ஏறவில்லை.
இப்படியே போனால் நாடாரும் முகஞ்சுளிப்பார்;
நானும் வேலை பார்க்கணும்.

       (8)

சொல்லாமல் கொள்ளாமல் ஏறிவிட்டது விலைவாசி.
கோடை மழை; ஆடிக் காற்று;

அப்பாவின் கோபம்;
அம்மாவின் கடுப்பு;

எது அதற்கு ஈடு?

              (9)

சொல்லாமல் கொள்ளாமல்
ஏறிவிட்டது விலைவாசி.

சொல்லாமல் கொள்ளாமல்
எகிறும் மின்கட்டணம்;

மருத்துவ செலவு;
கைபேசி கட்டணம்;

என்னதான் இனி செய்ய?

        (10)

சொல்லாமல் கொள்ளாமல்
ஏறிவிட்டது விலைவாசி.

பள்ளிக் கட்டணம்
எள்ளி சிரிக்குது!

புத்தக விலை
ஏறா மலை!

கழுத்தில் நிலையா தலை!

5-7-2023