எஸ்ஸார்சி வாசித்த கவிதைகள்

கவிதை வாசிக்கலாம் வாங்க. நிகழ்வு
17/11/23

1 சங்கடம்

ஒருவாரம் ஊரில் இல்லை
வந்து வீட்டைத்திறந்தால்
கப் என்று இருக்கிறது
ஜன்னல் திறந்து
வீடுகூட்டி
ஃபிரிட்ஜை நேருக்கு
கொண்டு வரணும்
பால் தயிர் தோசைமா
பச்சைமிளகாய் தேங்காய்
காய்கறி சிலவோடு
வீடு வந்தாயிற்று
டிவியை ஆன் செய்தேன்
ரெண்டு ரிமோட்டை யும்
அழுத்தி அழுத்திக் கைதான்
வலித்தது
டிவி இல்லாத வீட்டில்
ஏதோ ஓரு பெருங்குறை
நாளை மறுநாள்
உலகக் கோப்பை கிரிக்கெட்
இந்தியா ஃபைனலில்.
கவிதை நோட்டைக்
கையில் எடுத்தால்
டிவி மெக்கானிக்கைத்
தேடுவது யார்?
அவள்தான் என்னிடம்
பேசுகிறாளா
இல்லை ஏசுகிறாளா.

2 நியாயம்

நேற்றுக் கவிதைஎழுதி
முடிந்த பக்கத்தில்
இன்னும்
பாதி காலியாக இருந்தது
புதிய பக்கத்தைப் புறட்டி
தேதி போட்டுக்
கவிதை எழுதினேன்
பேரன் பார்த்துக்கொண்டே
இருந்தான்
என்ன பார்க்கிறாய் என்றேன்
‘அப்பா கிட்ட சொல்றேன்பார்’
என்றான் என்னிடம்.
அலுவலகம் முடிந்து
அவன் அப்பா வந்தான்
‘தாத்தா பாதி பேஜை காலியா வுட்டுட்டு
புது பேஜுல எழுதறார்
நீயே பார்த்துகோ’ என்றான்
என் மகன் என்னைப்
பார்த்தான் நான் பேரனைப்
பார்த்தேன்
‘ஆள் ஆளுக்கு ஒரு நியாயமா’
என்கிறான் பேரன்.

3 நீட்சி

இதுநாள்வரை யான்
பார்த்த கவியரங்கங்களில்
சிறப்பு
இணையக்கால கவியரங்கம்
அழகிய சிங்கரின்
கண்டுபிடிப்பு
பல்வேறு கருத்துக்கள்
பலப்பல குரல்களில்
யாருக்குத் தெரியும்
எத்தனை நாள் தொடருமோ
அறிவியலின் சாதனையை
அழகாய்க் கையாளும்
இணையக்கால கவியரங்கம்
விருட்சத்தின் நீட்சி
விருட்சத்தின் வெற்றி.

4 எங்கே போனார்கள்

தலையில் முண்டாசு கட்டிய
பெட்ரோமாக்ஸ்காரன்
ரேடியோ டிரான்சிஸ்டர் ரிப்பேர்காரன்
கடிகாரம் குடை
பூட்டு டார்ச்லைட் ரிப்பேர்காரன்
பாத்திரத்திற்கு ஈயம்
பூசி
சைக்கிளுக்கு பஞ்சர்ஒட்டி
‘அம்மா சோறு’என்னும்
ராப்பிச்சைக்காரன்
எல்லோரும் மொத்தமாய்ச்
சமூக மேடையைக்காலி செய்து தான் விட்டார்கள்
சாதித்து விட்டு நிற்கிறது
அறிவியல்.