எந்த ஊர் ?/ மதுவந்தி

                    பிறந்து வளர்ந்த மதுரை விட்டு, 
                    பிழைப்பிற்கென பம்பாய் வந்து, பின் 
                    கோவைக்கு மாற்றலாகி,
                    தணிக்கை, நிர்வாகமென 
                    வாரந்தோறும் பயணம் 
                    ஊர் ஊராய். 
                   அந்தமானில் பயண வேலை முடித்து     
                   விமான நிலையத்தில் காத்திருந்த வேளை,
                   அருகமர்ந்த பயணி பேச்சிடையே கேட்கிறார்,
                   “ நீங்கள் எந்த ஊர்?”. 
                   பதில் சொல்லாமல் 
                   யோசித்தபடியிருக்கும் என்னை 
                  ஆச்சரியமாய் பார்த்துவிட்டு 
                  பத்திரிகை படிக்க ஆரம்பிக்க,
                  யோசித்துக் கொண்டேயிருக்கிறேன்,

                  எது எனது ஊர்?.