கம்ப இராமாயணம் – தவம் செய்த தவம்
சூர்பனகை இராமனை முதன் முதலாகப் பார்க்கிறாள்.
அங்கே கம்பன் சூர்பனகை வாயிலாக இராமனின் சிறப்புகளை பாடுகிறான்.
இராமனின் வடிவழகை நோக்கினாள்.
சிறந்த உருவம்.
ஆனால் தவ வேடம்.
இந்த இராமன் தவம் செய்ய – அந்த தவம், என்ன தவம் செய்ததோ என்று வியக்கிறாள்.
எவன் செய, இனிய இவ் அழகை எய்தினோன்?
அவம் செயத் திரு உடம்பு அலச நோற்கின்றான்;
நவம் செயத்தகைய இந் நளின நாட்டத்தான்
தவம் செய, தவம் செய்த தவம் என்?’ என்கின்றாள்.
எவன் செய = என்ன வேண்டி?
இனிய = இனிமையான
இவ்அழகை = இந்த அழகைப்
எய்தினோன்? = பெற்றவன்
அவம் செயத் = கஷ்டப்பட்டு
திரு உடம்பு = தன்னுடைய சிறந்த உடல்
அலச நோற்கின்றான்; = வருந்தும்படி நோன்பு நோர்க்கின்றான்
நவம் செயத்தகைய = புதுமையானவற்றை செய்யத் தக்க
இந் நளின நாட்டத்தான் = இந்த நளினமான தோற்றத்தை உடையவன்
தவம் செய = தவம் செய்ய
தவம் செய்த தவம் என்?’ = அந்த தவம் என்ன தவம் செய்ததோ
என்கின்றாள். = என்கிறாள்
இராமன் தவம் செய்ய, அந்த தவமே தவம் செய்ய வேண்டும்.
கம்பனின் தமிழ் விளையாட்டை ரசித்தீர்களா?